ଲୋକସଭାରେ ପ୍ରବଳ ହଙ୍ଗାମା

ମୌସୁମୀ ଅଧିବେଶନର ପ୍ରଥମ ଦିନରେ ଲୋକସଭାରେ ତୀବ୍ର ହଟ୍ଟଗୋଳ ଦେଖାଦେଇଛି। ବିରୋଧୀ ଦଳମାନେ ଗୃହରେ କହିବାର ସୁଯୋଗ ନମିଳିବା ଅଭିଯୋଗ କରିଛନ୍ତି। ଅପରେସନ ସିନ୍ଦୂର ଓ ପହଲଗାମ ଉପରେ ଚର୍ଚ୍ଚା ଚାଲିଥିବା ବେଳେ ହୋହଲ୍ଲା ଯୋଗୁଁ ଗୃହ ଦୁଇ ଦୁଇ ଥର ମୁଲତବୀ ହୋଇଛି—ପ୍ରଥମେ ଦିନ ୧୨ଟା ଓ ପରେ ୨ଟା ଯାଏଁ। ଏହି ହଙ୍ଗାମା ମଧ୍ୟରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଗୃହ ବାହାରେ ପ୍ରତିକ୍ରିୟା ରଖି କହିଛନ୍ତି ଯେ, ସରକାର ବିରୋଧୀଙ୍କ ସ୍ୱରକୁ ଦବାଇବାକୁ ଚେଷ୍ଟା କରୁଛନ୍ତି। ସେ ଅଭିଯୋଗ କରିଛନ୍ତି ଯେ, ପ୍ରତିରକ୍ଷା ମନ୍ତ୍ରୀଙ୍କୁ ଗୃହରେ କହିବାର ଅନୁମତି ମିଳୁଥିବା ବେଳେ ବିରୋଧୀ ନେତାଙ୍କୁ ଏହା ମିଳୁନାହିଁ। ଏହା ଦର୍ଶାଉଛି ଯେ, ସରକାର ଗୃହରେ ବିରୋଧୀଙ୍କ ମତ ପ୍ରକାଶକୁ ଅଣଦେଖା କରୁଛନ୍ତି, ଯାହା ଗଣତାନ୍ତ୍ରିକ ପ୍ରକ୍ରିୟାକୁ ଦୁର୍ବଳ କରୁଛି। ସଂସଦରେ  ଅପରେସନ ସିନ୍ଦୂର ପରେ ଏହା ପ୍ରଥମ ଅଧିବେଶନ ଥିବା ବେଳେ ଗୃହ ପହଲଗାମ ଘଟଣାକୁ ନେଇ ସରଗରମ ରହିଛି । ତେବେ ସଂସଦର ଉଭୟ ଗୃହରେ ପ୍ରାଥମିକ ପର୍ଯ୍ୟାୟରେ ପହଲଗାମରେ ଆତଙ୍କୀ ହମଲାରେ ପ୍ରାଣ ହରାଇଥିବା ବ୍ୟକ୍ତିଙ୍କ ଉଦ୍ଦେଶ୍ୟରେ ଶୋକ ପ୍ରକାଶ କରାଯାଇଥିଲା । ପରେ ପ୍ରଶ୍ନକାଳ ଆରମ୍ଭରୁ ବିରୋଧୀ ହଙ୍ଗାମା କରିଥିଲେ ।