ଯୁଦ୍ଧ ମଧ୍ୟରେ ପୁଣି ଧମକ ଦେଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସୋମବାର ରାତିରେ ସାମ୍ବାଦିକ ସମ୍ମିଳନୀ କରି ବଡ଼ ସନ୍ଦେଶ ଦେଇଛନ୍ତି ରାଷ୍ଟ୍ରପତି ଟ୍ରମ୍ପ । ଏହି ସମୟରେ ଟ୍ରମ୍ପ F-15Eର ପାଇଲଟଙ୍କୁ କିଭଳି ଉଦ୍ଧାର କରାଯାଇଛି ସେନେଇ ସୂଚନା ଦେଇଛନ୍ତି । ଆମ (ଆମେରିକା) ଭଳି ସେନା ବିଶ୍ବର ଅନ୍ୟ କୌଣସି ଦେଶ ପାଖରେ ନାହିଁ ଏବଂ ଇରାନ୍କୁ ଗୋଟିଏ ରାତିରେ ଶେଷ କରିପାରିବୁ ବୋଲି ସେ ଖୋଲା ଧମକ ଦେଇଛନ୍ତି ।
ସାମ୍ବାଦିକ ସମ୍ମିଳନୀରେ ଟ୍ରମ୍ପ କହିଛନ୍ତି, ସବୁଠାରୁ କଠିନ ରେସକ୍ୟୁ ଅପରେସନର ଉତ୍ସବ ମନାଇବାକୁ ଏଠାକୁ ଆସିଛୁ । ଏମିତି ଉଦ୍ଧାର କାର୍ଯ୍ୟ କେବେ ହୁଏ ନାହିଁ , ପାଇଲଟଙ୍କୁ ଉଦ୍ଧାର କରିବା ଲାଗି ଆମେ ୨୦୦ ସୈନିକଙ୍କୁ ପଠାଇଥିଲୁ। ଏଫ-୧୫ ବିମାନ ଇରାନର ବହୁତ ଭିତରକୁ ଯାଇଥିଲା ।
ଇରାନକୁ ଗୋଟିଏ ରାତିରେ ଧ୍ବଂସ କରିପାରିବୁ: ଟ୍ରମ୍ପ
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ଇରାନକୁ ଗୋଟିଏ ରାତି ଶେଷ କରିପାରିବୁ ଏବଂ ଏହା ମଙ୍ଗଳବାର ରାତି ମଧ୍ୟ ହୋଇପାରେ। ବୋଧୁହୁଏ ଏହି ରାତି କାଲି ଆସିପାରେ ବୋଲି ଟ୍ରମ୍ପ ଧମକ ଦେଇଛନ୍ତି । ତାଙ୍କର ଏଭଳି ମନ୍ତବ୍ୟକୁ ନେଇ ପୁଣି ହଇଚଇ ସୃଷ୍ଟି ହୋଇଛି ।
ରେସକ୍ୟୁ ଅପରେସନକୁ ନେଇ କଣ କହିଲେ ଟ୍ରମ୍ପ ?
ଟ୍ରମ୍ପ କହିଛନ୍ତି ଯେ, ଏହା ଏକ ବିପଦପୂର୍ଣ୍ଣ ନିଷ୍ପତ୍ତି ଥିଲା। ଏହା ୧୦୦ ଜଣଙ୍କ ମୃତ୍ୟୁ ସହିତ ଶେଷ ହୋଇପାରିଥାନ୍ତା। ଆମେ ଆମର କୌଣସି ସୈନିକଙ୍କୁ ପଛରେ ଛାଡ଼ି ନଥିଲୁ। ଆମେ ଶତ୍ରୁ ଅଞ୍ଚଳରେ ୨୧ଟି ବିମାନ ମୁତୟନ କରିଥିଲୁ। ଏହି ମିଶନ ସ୍ପଷ୍ଟ ଦିବାଲୋକରେ ୭ ଘଣ୍ଟା ପର୍ଯ୍ୟନ୍ତ ଚାଲିଥିଲା। ଆମ ପାଖରେ ଥିବା ଅସ୍ତ୍ରଶସ୍ତ୍ର ଏବଂ ବାହିନୀ ଅନ୍ୟ କାହା ପାଖରେ ନାହିଁ।
ସେ ଆହୁରି କହିଛନ୍ତି, ଷ୍ଟେସନ ଅଧିକାରୀ ପ୍ରଥମ ପାଇଲଟଙ୍କଠାରୁ ବହୁତ ଦୂରରେ ଅବତରଣ କରିଥିଲେ। ସେ ଆହତ ହୋଇ ଏକ ବିପଦପୂର୍ଣ୍ଣ ଅଞ୍ଚଳରେ ଫସି ରହିଥିଲେ, ପ୍ରଚୁର ରକ୍ତସ୍ରାବ ହେଉଥିଲା। ସେ ନିଜେ ତାଙ୍କର ସ୍ଥାନ ସଂପର୍କରେ ସୂଚନା ଦେଇଥିଲେ । ତାଙ୍କୁ ଉଦ୍ଧାର କରିବା ପାଇଁ ଏକ ବଡ଼ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ସେ ୪୮ ଘଣ୍ଟା ପର୍ଯ୍ୟନ୍ତ ଲୁଚି ରହିଥିଲେ। ଉଦ୍ଧାର କାର୍ଯ୍ୟରେ ୧୫୫ ଟି ବିମାନ ସାମିଲ ଥିଲା।
ଟ୍ରମ୍ପ ଦାବି କରିଛନ୍ତି ଯେ, ଏହି ଅପରେସନରେ କୌଣସି କ୍ଷତି ହୋଇନାହିଁ। ଆମେ ପୁରୁଣା ବିମାନଗୁଡ଼ିକୁ ଉଡ଼ାଇ ନେଇ ଆସିଥିଲୁ । ଓଦା ବାଲି ଯୋଗୁଁ C-130 ହର୍କୁଲିସ୍ ବିମାନ ଉଡ଼ି ପାରିଲା ନାହିଁ, ତେଣୁ ଆମେ ଏହାକୁ ସେଠାରେ ଧ୍ବଂସ କରିଦେଲୁ । ଆମେ ଚାହୁଁ ନଥିଲୁ ଯେ, ଇରାନ ଆମ ବିମାନକୁ ଯାଞ୍ଚ କରୁ ।
