ନିରାକାରପୁର : ଠାକୁରଙ୍କ ଦୁଇଟି ଦାନ ହୁଣ୍ଡି ବାକ୍ସ ଚୋରି କରିଥିଲେ । ଏବେ ମାଆ-ପୁଅ ଧରାପଡ଼ି କୋର୍ଟ ଚାଲାଣ ହେଲେ । ଏଭଳି ଘଟଣା ଘଟିଛି ଖୋର୍ଧା ଜିଲ୍ଲା ନିରାକାରପୁର ଅଂଚଳରେ । ସୂଚନା ଅନୁସାରେ ନିରାକାରପୁର, ରାମମନ୍ଦିର ନିକଟରେ ଥିବା ସାଇ ମନ୍ଦିରର ଦୁଇଟି ଦାନ ହୁଣ୍ଡି ବାକ୍ସ ନଥିବା ପୂଜକ ରବିବାର ସକାଳୁ ଦେଖିବାକୁ ପାଇଥିଲେ । ଯାହାକି ଶନିବାର ବିଳମ୍ବିତ ରାତିରେ କୌଣସି ଦୁର୍ବୃତ୍ତ ଚୋରିକରି ନେଇଥିବା ସ୍ଥାନୀୟ ଥାନାରେ ମନ୍ଦିର ପକ୍ଷରୁ ଲିଖିତ ଅଭିଯୋଗ କରାଯାଇଥିଲା । ଅଭିଯୋଗକୁ ଆଧାରକରି ନିରାକାରପୁର ପୋଲିସ ସନ୍ଧାନୀ କୁକୁର ମାଧ୍ୟମରେ ଲୁଟ ହୋଇଥିବା ହୁଣ୍ଡିକୁ ଉଦ୍ଧାର କରି ଚୋରି କରିନେଇଥିବା ମାଆ -ପୁଅ କୁ ଗିରଫ କରି ଆଜି ଅପରାହ୍ନ ରେ କୋର୍ଟ ଚାଲାଣ କରିଥିବା ଥାନା ଆଇଆଇସି ବିଶ୍ୱଜିତ ରାଉତରାୟ ସୂଚନା ଦେଇଛନ୍ତି । ଗିରଫ ମାଆ-ପୁଅ ହେଲେ ଭୂଷଣ୍ଡପୁର ଫାଣ୍ଡି ଉରୁମୁଖୀ ଗ୍ରାମର ସହଦେଵ ସିଂ ଙ୍କ ସ୍ତ୍ରୀ ଜୟନ୍ତୀ ସିଂ ଓ ପୁଅ ସୁଜିତ ସିଂ । ଏ ଦୁଇ ଜଣ ସ୍ଥାନୀୟ ନରେନ୍ଦ୍ରପୁର ସାହିରେ ଭଡ଼ା ଘରେ ରହୁଥିଲେ । ଅଭିଯୋଗ ଅନୁଯାଇ ୨୬୮/୨୫ ରେ ଏକ ମାମଲା ରୁଜୁ ହୋଇଛି । ସେମାନଙ୍କ ଠାରୁ ଦୁଇଟି ହୁଣ୍ଡି ସହ ନଗଦ ୧୮୧0 ଟଙ୍କା ଓ କିଛି ସାମଗ୍ରୀ ଉଦ୍ଧାର କରିଛି ପୋଲିସ ।
ସାଇ ମନ୍ଦିରର ଦୁଇଟି ଦାନ ହୁଣ୍ଡି ବାକ୍ସ ଚୋରି କରି ଧରାପଡ଼ିଲେ ମା,ପୁଅ
